Trump oo Ku Dhawaaqay Dhammaadka Dagaalka Iran, Israa’iil oo lagala tashan

WASHINGTON – Madaxweynaha Mareykanka Donald Trump ayaa ku dhawaaqay in dagaalka Iran uu soo dhammaaday, isagoo sheegay in heshiis lagu soo afjarayo colaadda uu dhowaan si rasmi ah u dhaqan geli doono, arrintaas oo la sheegay inay si weyn uga yaabisay dowladda Israa’iil.

"We ended the war with Iran today," ayuu Trump ku yiri hadal uu jeediyay, isagoo sheegay in la gaaray waxa uu ku tilmaamay "heshiis weyn" oo looga hortagayo in Iran hesho hub nukliyeer ah, isla markaana dib loogu furi doono marin-biyoodka muhiimka ah ee Hormuz.

Wararka ayaa sheegaya in Trump uu joojiyay duqeymo militari oo horay loo qorsheeyay in lagu qaado Iran, kadib markii uu sheegay in qodobadii ugu dambeeyay ee heshiiska ay dhinacyadu isku afgarteen. Wuxuu tilmaamay in heshiiska si rasmi ah loogu saxiixi karo toddobaadkan gudaha Yurub.

Si kastaba ha ahaatee, mas’uuliyiin Iiraaniyiin ah ayaa sheegay in aan weli la gaarin go’aan kama dambeys ah, iyagoo xusay in wada-hadalladu weli socdaan islamarkaana heshiiska uusan si rasmi ah u dhaqan gelin.

Dhanka kale, warbaahinta caalamiga ah ayaa sheegtay in Ra’iisul Wasaaraha Israa’iil Benjamin Netanyahu aanu horay uga warqabin qorshaha Trump ee lagu joojinayay duqeymaha, taasoo sababtay in Tel Aviv ay si lama filaan ah ula kulanto isbeddelka cusub ee siyaasadda Washington.

Horumarkan ayaa imaanaya iyadoo toddobaadyadii la soo dhaafay ay jireen iska horimaadyo iyo xiisado sii kordhayay oo u dhexeeyay Mareykanka, Israa’iil iyo Iran. Inkastoo Trump uu ku adkeysanayo in heshiisku yahay mid dhow, haddana weli waxaa jira shaki ku saabsan sida iyo goorta si rasmi ah loo dhaqan gelin doono.

Haddii heshiiska la xaqiijiyo, wuxuu noqon karaa tallaabo muhiim ah oo lagu soo afjarayo colaadda gobolka iyo dib u dejinta xasilloonida Bariga Dhexe.

GAROWE ONLINE