Trump oo ku dhawaaqay go'aan cusub oo ku saabsan dagaalka Iran

WASHINGTON — Madaxweynaha Mareykanka Donald Trump ayaa subaxnimadii hore ee Talaadada sheegay in wadahadalada u dhexeeya Mareykanka iyo Iiraan ay wali si habsami leh u socdaan, saacado yar ka dib markii ay Iiraan iyo Israa’iil ku heshiiyeen inay joojiyaan weerarada tooska ah ee dhexmaray, kuwaas oo halis geliyey xabad-joojintii nugleyd ee horay u jirtay.

Trump ayaa tilmaamay in wadahadalada lagula jiro xukuumadda Tehraan aysan joogsan xilligii ay socotay raddadii rabshadaha, wuxuuna calaamad u weyn u muujiyey in heshiis rasmi ah oo lagu soo afjarayo colaadda lagu gaari karo muddo hal ama laba maalmood gudahood ah, isagoo intaas ku daray inay wax walba u socdaan si wanaagsan.

Wuxuu intaas ku daray in labada dhinac ay isweydaarsanayeen fariimo, balse hadda ay iyadoo loo marayo dhex-dhexaadintiisa ay ku heshiiyeen inay dagaalka joojiyaan. Trump ayaa saxafiyiinta u sheegay inay hadda marayaan marxaladdii ugu dambeysay ee heshiis aad u wanaagsan, kaasi oo aan marnaba u ogolaan doonin Iiraan inay qaab walba ama si walba u horumariso hubka nukliyeerka. Sidoo kale wuxuu xaqiijiyey in marinka muhiimka ah ee Hormuz dib loo furi doono isla marka la saxiixo heshiiska, taasi oo dhici karta laba ama saddex maalmood gudahood.

Maalintii Isniinta, Iiraan ayaa ku dhowaaqday inay joojisay weeraradii ay ku haysay Israa’iil, balse waxay uga digtay jawaab kulul haddii ay ciidamada Israa’iil sii wadaan weerarada ay ka geysanayaan dalka Lubnaan. Sidoo kale, Madaxweyne Trump ayaa Isniintii sheegay in Mareykanku uu ku dhowaqi doono "guul dhammaystiran" oo laga gaaro Iiraan labada toddobaad ee soo socda, isagoo xusay in tani ay sababi doonto inay hoos u dhacaan qiimaha saliidda adduunka.

Xiisadda gobolka ayaa cirka isku shareertay maalintii Axadda ka dib markii Israa’iil ay duqaysay caasimadda Lubnaan ee Beirut, inkastoo ay jirtay xabad-joojin socotay. Tallaabadan ayaa ku khasabtay Iiraan inay gantaallo aargoosi ah ku tuurto waqooyiga Israa’iil, taasi oo iyaduna keentay in Israa’iil ay qaaddo duqaymo xiriir ah oo ka dhan ah bartilmaameedyada Iiraan.

Trump ayaa soo dhexgalay xiisaddan aroornimadii Isniinta, isagoo bartiisa Truth Social ugu baaqay Israa’iil iyo Iiraan inay si degdeg ah u joojiyaan dagaalka, halka Ra'iisul Wasaaraha Israa'iil Benjamin Netanyahu uu sheegay in dagaalku hadda joogsaday balse ay ka xaalad-qaadan doonaan haddii mar kale la soo weeraro.

GAROWE ONLINE