Farmaajo oo gudoomiyeyaal cusub u magacaabay maxkamadaha Banaadir
-
WARIYAHA MUQDISHO GAROWE ONLINE
- Posted On 14-05-2020, 08:20PM
MUQDISHO, Soomaaliya - Madaxweyne Maxamed Cabdullaahi Farmaajo ayaa magacaabay Guddoomiyeyaasha Maxkamadda Gobolka Banaadir iyo Maxkamadda Racfaanka Gobolka Banaadir kaddib soojeedin ka timid Guddoomiyaha Maxkamadda Sare ee dalka, Baashe Yuusuf Axmed.
Farmaajo ayaa xilka Guddoomiyaha Maxkamadda Gobolka Banaadir waxa uu u magacaabay Garyaqaan Cabdikhadar Maxamed Xasan oo ku takhasusay Shareecada iyo Qaanuunka.
Garyaqaan Muuse Macalin Maxamed oo xilkaas soo hayey tan iyo Luuliyo 2018-kii ayaana jagadaas laga eryay. Warar ayaa sheegaya in Muuse ay is-khilaafeen Baashe.
Sidoo kale, Garyaqaan Maxamed Axmed Cismaan ayaa Madaxweynuhu waxa uu u magacaabay Guddoomiyaha Maxkamadda Racfaanka Gobolka Banaadir.
Xilkan waxaa horey uu u hayey Garyaqaan Abshir Cumar Cabullaahi. Mas'uulkan la eryay waxaa la aaminsan yahay in uu galaaftay khilaafka u dhaxeeyay Muuse iyo Baashe.
Madaxweyne Maxamed Cabdullaaho Farmaajo ayaa ku adkeeyey Guddoomiyeyaasha uu magacaabay in ay dhawraan sarraynta sharciga, si simanna ugu adeegaan bulshada Soomaaliyeed.
Dhanka kale, Madaxweynaha Jamhuuriyadda ayaa ku ammaanay gudoomiyeyaashii hore ee xilka laga qaaday wakhtiga ay u hureen u adeegidda shacabkooda iyo dalkooda. Balse, bayaanka laguma soo hadal-qaadin sababaha keenay in isbedelkaan uu Farmaajo ku sameeyay maxkamadaha.
GAROWE ONLINE
