Silvia Romano oo horey ay Al-Shabaab u qafaalatay oo lasii daayey

ROMA, Italy – Haweenaydii arrimaha samafalka ka shaqeyneysay ee Silvia Constanca Romano taasoo dabley aan la aqoonsan ay waqooyi barri Kenya ka qafaasheen November, 2018, ayaa lasii daayey.

Ra'iisul wasaaraha Talyaaniga, Giuseppe Conte, ayaa bartiisa Twitter-ka ku shaaciyey sii deynta Romano. Wallow uusan bixin tafaasiil dheeraad ah, haddana wuxuu u mahadceliyey sirdoonka waddankiisa.

Maleeyshiyaadka Al-Shabaab ayaa lala xiriiriyey qafaalashadda Ms Romano oo ahayd maamulaha African Milele Onlus, oo ah hay'ad aan dowli ahayn oo ka howlgasha qaar kamid ah dalalka qaaradda.

Warbaahinta Talyaaniga ayaa ku warantay in haweenayda ay haatan ku sugan tahay Muqdisho isla markaana soo deynteeda ay iska kaashadeen mukhaabaraadka Soomaaliya, Turkiga iyo Italy.

Illaa iyo haatan, ma cadda qaabka ay ku timid sii deynta 23-sano jirtaan horey loo wariyey in loosoo wareejiyey koonfurta Soomaaliya gaar ahaan degaanadda maamul goboleedka Koonfur Galbeed.

Xoogaga gacansaarka la leh Al-Qaacida ayaa horey u codsaday aduun dhan 5 milyan oo Doolar oo madax furasho ah si ay u soo daayaan Silvia Constanca Romano, balse waxaa ka hor-timid Kenya.

Al-Shabaab ayaa afduub kula kacda wariyeyaasha, samafalayaasha iyo shaqsiyaad kale oo ay bartilmaameedsadaan ee ajnabiga ah si ay uga helaan lacag madax-furasho ah, waxayna u tahay il-dhaqaale.

GAROWE ONLINE