Garabka Jamaal oo qaadacay shirweynaha xisbiga UCID
-
- Posted On 29-10-2016, 04:22PM
HARGAYSA, Somaliland- Garabka Jamaal Cali Xuseen ee qaban qaabada shirweynaha xisbiga mucaaradka UCID, ayaa ku dhawaaqay inay qaadaceen kulankaas kadib markii Faysal Cali Waraabe ku dhawaaqay inuu yahay murashax madaxweyne.
Xubnahan oo warbaahinta kula hadlay magaalada Hargaysa, ayaa sheegay in shirweyne aysan dhici karin iyadoo xisbigu uusan lahayn Guddoomiye, waxayna taas badalkeeda ku dhawaaqeen in la isugu yimaado shir deg deg ah hogaanka sare xisbiga lagu doorto.
Waxay ku doodeen inaysan wada hadli karin garabyada is-haya ilaa laga helo hogaan xisbi, iyagoo ku dhawaaqay in 06 November, 2016 qaban doonaan kulan lagu doorto Guddoomiye.
Shirweynaha garabka ay qaadaceen ayaa waxaa go'aamisay maxkamadda Somaliland kadib markii ay is-qabteen Faysal Cali Waraabe iyo Murashax Jamaal Cali Xuseen.
Lama oga sida dhinaca kale u aqabali doonaan waqtiga xubnahan sheegayaan in doorasho lagu qabto.
Xisbiga UCID, ayaa muddooyinkii dambe galayay fowdo siyaasadeed iyo is-qab qabsi u dhaxeeya madaxdooda, waxayna arrintan kusoo aaday iyadoo waqti yar ka harsantahay doorashada madaxtooyada ee maamulka Somaliland.
GAROWEONLINE
