Maamulka Somaliland oo digniin kasoo saarey shirarka beeelaha

HARGEYSA, Somaliland - Maamulka Somaliland ayaa Axaddii shalay uga digay shaqsiyaad iyo kooxo lagu eedeeyay in ay nabadda wax u dhimayaan, ku xad-gudbinayaan, iyo abaabulka shirar beeleedyo ka socda guud ahaan maamulka gooni-isu-taagga ah ee Somaliland.

War-saxaafadeed ka soo baxay Wasaaradda Arrimaha Gudaha Somaliland ayaa lagu sheegay in maamulku uu ballan qaaday in tallaabo sharciga waafaqsan laga qaadi doono cid kasta oo ku kacda fal-dambiyeedka ama carqaladaynta amniga guud.

“Saxaafaddu waa inay ka fogaato baahinta hadalada naceybka ah ee dhaawacaya midnimada bulshada iyo qarannimada Jamhuuriyadda Somaliland,” ayaa lagu yiri war-saxaafadeedka.

Xukuumadda Hargeysa ayaa ku cel-celisay inay mamnuucday in hoteellada iyo goobaha caamka ah lagu qabto shir beeleedyada. Hoteelada ayaa la faray in ay ka fogaadaan in lagu qabto shirarka noocaan oo kale ah oo maamulku u arko mid halis ku ah xasiloonida iyo wadajirka Somaliland.

GAROWE ONLINE