Somaliland oo aan cayrin doonin Nile Academy
-
- Posted On 19-07-2016, 06:28PM
HARGAYSA, Somaliland- Xukuumadda Somaliland ayaa sheegtay inaysan deegaanadeeda ka mamnuuci doonin hay'adda Turkish-ka ah ee Nile Academy iyadoo tilmaamtay inaysan wax dambi ah ka galin maamulkaasi.
Wasiirka wasaaradda Arrimaha Dibadda Somaliland Sacad Cali Shire, ayaa warbaahinta u sheegay in hay'addaasi oo xarun ku leh magaalada Hargaysa shaqadooda sii wadan doonto islamarkaana aanay mamnuuci doonin.
Sacad Cali Shire, ayaa tilmaamay in hadii Nile Academy dambi gali lahayd maxkamadda sare kusoo oogi lahayd eedaha loo haysyto, waxuuna xusay inay u madax-bannaanyihiin shaqadooda.
Hadalkan wasiirka Arrimaha Dibadda Somaliland, ayaa kusoo beegmay xilli xukuumadda Somalia u hogaansatay dalab ka yimi madaxweynaha dalka Turkiga kaasoo codsaday in waddanka laga saaro hay'addaas oo uu leeyahay nin loo haysto afgambigii dhicisoobay ee dhawaan ka dhacay waddanka Turkiga.
Xukuumadda Somalia ayaa mamnuucday dhammaan shaqadii Nile ka haysay magaalada Muqdishu iyadoo shaqaalihii ka howlgali jiray loo qabtay muddo 7 casho ah inay dalka kaga baxaan.
Somaliland ayaa sheegata inay tahay dal kamadax bannaan Somalia, waloow aysan wali helin aqoonsi.
GAROWEONLINE
