Dowladda Soomaaliya oo ka hadashay colaadda ka taagan Aricadeeye, baaqna u dirtay dhinacyada

MUQDISHO, Juun 23, 2026 – Wasaaradda Arrimaha Gudaha Xukuumadda Federaalka Soomaaliya ayaa ka tacsiyaysay colaadda ka taagan deegaanka Aricadeeye ee gobolka Sool, taas oo u dhexeysa laba beelood oo walaalo ah isla markaana sababtay khasaare naf iyo maalba leh.

Wasaaraddu ayaa si adag u cambaaraysay falalka gacan ka hadalka ah ee sababay dhimasho iyo dhaawac soo gaaray dad rayid ah, iyadoo ku baaqday in si degdeg ah oo shuruud la’aan ah loo joojiyo dagaalka.

“Wasaaraddu waxay ku baaqaysaa in si degdeg ah oo shuruud la’aan ah loo joojiyo khilaafaadka iyo dhammaan falalka hurin kara colaadda,” ayaa lagu yiri war-saxaafadeedka, iyadoo lagu adkeeyay in dhinacyada ay khusayso ay mudnaanta siiyaan nabadda, wada noolaanshaha iyo ilaalinta xasilloonida shacabka.

Wasaaraddu waxay sidoo kale ugu baaqday odayaasha dhaqanka, culimada, haweenka, dhallinyarada, waxgaradka deegaanka iyo masuuliyiinta maamulka fadhigiisu yahay Laascaanood inay door muuqda ka qaataan dejinta xiisadda, xoojinta wada-hadallada iyo raadinta xal waara.

Ugu dambayn, Wasaaradda Arrimaha Gudaha ayaa Alle uga bariday inuu u naxariisto dadkii ku dhintay dhacdada, dhaawacyadana uu u boogo-dhayo, isla markaana shacabka ay dhibaatadu saameysayna ka dulqaado xaaladda murugsan.

Ugu yaraan 21 qof oo shacab ah oo lagu dilay weerarka ka dhacay Aricadeeye ayaa aas-wadareed loo sameeyay Maanta. Dagaalkan ayaa salka ku haya muran dhanka dhulka ah.

GAROWE ONLINE