Dowladda Soomaaliya oo la safatay Kuwait oo muranka xudduudda badda kala dhexeeya Iraq

MUQDISHO, Soomaaliya — Dowladda Federaalka Soomaaliya ayaa ku dhawaaqday inay "garab istaag buuxa" u muujisay dowladda Kuwayt, ka dib markii ay soo baxeen walaacyo ku saabsan xudduudaha badda ee u dhexeeya dalalka Kuwayt iyo Ciraaq.

Warsaxafadeed ka soo baxay Wasaaradda Arrimaha Dibadda iyo Iskaashiga Caalamiga ah ee Soomaaliya 25-kii Febraayo, 2026, ayaa lagu sheegay in Soomaaliya ay si dhow ula socoto liiska isuduwidda xudduudaha badda (maritime coordinates) oo ay dowladda Ciraaq u gudbisay Qaramada Midoobay. Dowladda Soomaaliya waxay ka digtay in tallaabadani ay saameyn ku yeelan karto madax-bannaanida iyo xudduudaha badda ee dalka Kuwayt.

1 - Qoraalka wasaaradda ayaa lagu nuux-nuuxsaday muhiimadda ay leedahay in la dhowro xeerarka caalamiga ah, gaar ahaan:

2 - Heshiiskii Qaramada Midoobay ee Sharciga Badda ee 1982-kii.

3 - Go'aankii Golaha Ammaanka ee Qaramada Midoobay lambarkiisu ahaa 833 (1993), kaas oo qeexaya xudduudaha u dhexeeya labada dal.

4 - Dhammaan heshiisyada laba-geesoodka ah ee horay loo gaaray.

Dowladda Soomaaliya, iyadoo tixraacaysa xiriirka qotada dheer iyo walaaltinimada ka dhaxaysa labada dal, waxay ku baaqday in lagu xaliyo kala duwanaanshaha wadahadal dhaxal-gal ah, is-xakamayn, iyo hab nabadeed. Tallaabadan ayaa looga gol-leeyahay in lagu xoojiyo xasilloonida gobolka iyo deris-wanaagga.

Go'aankan ayaa muujinaya doorka diblomaasiyadeed ee Soomaaliya ay ku leedahay arrimaha ka taagan gobolka Bariga Dhexe iyo sida ay ugu go'an tahay ilaalinta madax-bannaanida dalalka saaxiibka ah.

GAROWE ONLINE