Go’doomintii hawada ee Koonfur Galbeed oo dhammaatay: Diyaaradaha rayidka ah oo ka degay Baydhabo.

MUQDISHO – Duulimaadyadii ganacsiga ee tagi jiray Dowlad-goboleedka Koonfur Galbeed Soomaaliya ayaa dib u bilowday Maanta, kadib hakad ku dhowaad laba toddobaad socday oo bilaabmay 18-kii Maarso.

Dib u bilaabashada duulimaadyada ayaa timid maalin kadib markii ciidamada Dowladda Federaalka ay si buuxda ula wareegeen caasimadda maamulka, Baydhabo.

Diyaarad ganacsi oo siday ilaalada madaxtooyada ayaa aroortii hore ee Talaadada ka degtay garoonka Shati Gaduud ee Baydhabo, ka hor wafdi heer sare ah oo uu hoggaaminayo Guddoomiyaha Baarlamaanka Soomaaliya Aadan Maxamed Nuur (Madoobe). Mas’uuliyiinta federaalka ayaa la filayaa inay bilaabaan marxalad siyaasadeed oo cusub kadib markii ay ciidamada federaalka la wareegeen magaalada, taasoo keentay iscasilaadda madaxweynihii Koonfur Galbeed Cabdicasiis Xasan Maxamed Laftagareen.

Adan Maalim Ibraahim, oo ah wakiil socdaal oo ka howlgala Baydhabo, ayaa sheegay in tigidhada la bilaabay in la qabsado xalay, isla markaana hawlihii garoonka magaalada — oo ka mid ah kuwa ugu mashquulka badan dalka — ay dib u furmeen.

Maamulka Koonfur Galbeed ayaa hakiyay duulimaadyada ganacsiga 18-kii Maarso, xilli uu jiray khilaaf kala dhexeeyay Dowladda Federaalka Soomaaliya oo la xiriiray muddo-kordhinta Laftagareen iyo wax-ka-beddelka dastuurka. Intii uu hakadku socday, waxaa la oggolaaday oo keliya duulimaadyada gargaarka ee Qaramada Midoobay iyo Midowga Afrika.

GAROWE ONLINE