Gollaha Mustaqbalka oo Su’aal Geliyay Sharciyadda Guddoomiyaha Cusub ee Golaha Shacabka

MUQDISHO, 11 Agoosto — Golaha Mustaqbalka Soomaaliyeed ayaa ka hor yimid doorashada guddoomiyaha cusub ee Golaha Shacabka, isagoo sheegay in muddo-xileedka Baarlamaanka Federaalka Soomaaliya uu dastuur ahaan dhammaaday 14-kii Abriil 2026.

Golaha ayaa sheegay in Baarlamaanka uusan sharci ahaan awood u lahayn inuu iskiis u sameysto muddo-kordhin, isagoo xusay in muddo-xileedyada hay’adaha dowladda lagu maamuli karo oo keliya dastuurka iyo heshiis siyaasadeed oo loo dhan yahay.

Waxa uu sidoo kale ka digay in doorasho ama go’aan siyaasadeed lagu saleeyo sharciyad muran ka taagan yahay ay dhalin karto natiijooyin aan si guud loo aqoonsan, taasoo sii xoojin karta khilaafka siyaasadeed ee dalka.

Golaha Mustaqbalka ayaa ugu baaqay dhinacyada siyaasadda inay khilaafaadka ku saabsan doorashooyinka iyo muddo-xileedyada ku xalliyaan wada-tashi iyo heshiis siyaasadeed, isagoo sheegay in wax-ka-beddelka dastuurka iyo go’aannada muhiimka ah aan lagu dhaqaaqin hannaan aan loo dhanayn.

Hadalkan ayaa yimid saacado kadib markii Xildhibaan Cabdulqaadir Maxamed Nuur Jaamac loo doortay Guddoomiyaha Golaha Shacabka, kaddib doorasho maanta ka dhacday xarunta Baarlamaanka ee Muqdisho.

Cabdulqaadir Maxamed Nuur Jaamac ayaa helay 142 cod, halka musharraxa kale, Cabdulqaadir Cumar Macallin, uu helay 30 cod, iyadoo laba cod ay xumaadeen.

GAROWE ONLINE