Halkee Marayaa Shirkii u Dhexeeyey Golaha Mustaqbalka iyo Dowladda Federaalka?

MUQDISHO — Wadahadalladii u dhexeeyey Golaha Mustaqbalka Soomaaliyeed iyo Dowladda Federaalka ayaa galay marxalad cusub, kaddib kulan ay yeesheen xubnaha Golaha oo ay ku go’aamiyeen in ay si wadajir ah uga qaybgalaan kulan ka dhici doona Villa Somalia maalinta Axadda.

Go’aankan ayaa yimid kaddib markii ay guul-darraysteen dadaallo hore oo lagu doonayay in arrimaha doorashooyinka lagu xalliyo wada-xaajoodyo heer guddi iyo kulamo gaar gaar ah. Ilo ku dhow Golaha ayaa sheegaya in hoggaanka Goluhu u arkay in waqtigu u baahan yahay wada-hadal toos ah oo heer sare ah si loo dedejiyo is-afgaradka.

Golaha Mustaqbalka ayaa muujiyey mowqif mideysan oo ku saabsan qabashada doorasho dadban oo leh metelaad ka ballaaran kuwii hore, islamarkaana la dhammaystiro ka hor bisha May. Sidoo kale, Goluhu wuxuu ku adkeeyey in doorashooyinka dowlad-goboleedyada Koonfur Galbeed, Galmudug iyo Hirshabeelle lagu qabto qaab la jaanqaadaya nidaamyada ka hirgalay maamullada kale, si loo helo isu-dheellitirnaan siyaasadeed iyo mideyn habraac.

Dhinaca kale, Dowladda Federaalka waxay sii waddaa dhammaystirka dib-u-eegista Dastuurka Federaalka, iyadoo dhinacyada siyaasadda ku boorrisay in ay soo gudbiyaan qodobada ay ku kala aragti duwan yihiin. Dowladda dhexe waxay ku adkaysanaysaa in dalka laga qabto doorashooyin toos ah oo baarlamaan ah, kuwaas oo lagu saleeyo dastuurka la cusbooneysiinayo, isla markaana ay maamulayaan hay’adaha doorashooyinka federaalka.

Warar laga helayo ilo ka tirsan dowladda ayaa tilmaamaya in haddii aan la helin is-afgarad ku saabsan doorashooyinka tooska ah, ay suuragal tahay in dib loogu laabto qaab ay odayaasha dhaqanku door ku lahaayeen soo xulista xildhibaannada, sida ka dhacday doorashadii 2012.

Shirka la filayo inuu ka dhaco Villa Somalia ayaa loo arkaa mid go’aan ka gaari kara jihada ay qaadi doonaan wada-hadallada, xilli ay weli taagan yihiin kala aragti duwanaansho ku saabsan qaabka ugu habboon ee lagu gaari karo doorasho la isla oggol yahay.

GAROWE ONLINE