Madaxweyne Axmed Madoobe oo la kulmay Taliyaha Howlgallada Gaarka ah ee AFRICOM
-
GAROWE ONLINE
- Posted On 09-03-2026, 10:18PM
KISMAYO, Jubaland – Madaxweynaha Jubaland, Axmed Maxamed Islaam, ayaa xarunta madaxtooyada ee magaalada Kismayo ku qaabilay wafdi heer sarre ah oo uu hoggaaminayo Taliyaha Howlgallada Gaarka ah ee Taliska Mareykanka ee Afrika (AFRICOM), Maj. Gen. Claude K. Tudor Jr.
Kulankan muhiimka ah ayaa diiradda lagu saaray qodobbada soo socda:
Iskaashiga Amniga: Xoojinta xiriirka dhinaca nabadgelyada ee u dhexeeya Jubaland iyo saaxiibbada caalamiga ah.
La-dagaallanka Al-Shabaab: Dardargelinta howlgallada ka dhanka ah Al-Shabaab si looga sifeeyo deegaannada ay weli ku dhuumaalaystaan.
Xasilloonida Gobolka: Taageeridda dadaallada lagu xaqiijinayo nabadgelyada dhabta ah ee ka jirta deegaannada hoos yimaada dowlad goboleedka Jubaland.
Guulaha Ciidamada iyo Bogaadinta AFRICOM
Maj. Gen. Claude K. Tudor Jr. ayaa intii uu kulanku socday bogaadin weyn u soo jeediyay Ciidamada Daraawiishta Jubaland iyo Ciidamada Kumaandooska Soomaaliyeed ee Danab (qeybta Jubaland).
Taliyaha ayaa xusay in howlgalladii u dambeeyay ee ay iska kaashadeen labada dhinac ay horseedeen guulo wax ku ool ah oo dhabar-jab weyn loogu gaystay kooxaha nabad-diidka ah.
"Wada-shaqeynta ciidanka Jubaland iyo kuwa Danab waa tusaale muujinaya sida loogu guulaysan karo sugidda amniga iyo ciribtirka Khawaarijta."
Madaxweyne Axmed Maxamed Islaam waxaa kulankan ku wehelinayay Wasiirka Amniga Gudaha ee Jubaland, Mudane Yusuf Xuseen Cismaan, iyadoo kulanku uu kusoo dhammaaday is-afgarad ku aaddan kordhinta taageerada dhinaca tababarka iyo qalabeynta ciidamada.
GAROWE ONLINE
