Qaramada Midoobay oo Taageertay Wada-hadallada Is-mari-waaga Doorashada

MUQDISHO, Soomaaliya — Howlgalka Kumeel-gaarka ah ee Qaramada Midoobay ee Soomaaliya (UNTMIS) ayaa si rasmi ah u soo dhaweeyay casuumaadda ay Dowladda Federaalka Soomaaliya u fidisay saamilayda siyaasadda, taas oo ku aaddan isugu imaatinka shir wadatashi oo heerkiisu sarreeyo, kaas oo ujeedkiisu yahay in xal loogu helo is-mari-waaga siyaasadeed ee dalka ka jira.

Bayaan lagu daabacay baraha bulshada, ayay Qaramada Midoobay ku qeexday shirkaas la qorsheeyay inuu yahay fursad muhiim ah oo lagu heli karo waddo midaysan oo loogu gudbo arrimaha masiiriga ah ee qaranka, kuwaas oo muddo dheer ay isku khilaafsanaayeen dowladda iyo mucaaradka.

“UNTMIS waxay soo dhaweynaysaa casuumaadda ay Dowladda Federaalka Soomaaliya u fidisay Golaha Mustaqbalka Soomaaliya si loo qabto kulan lagu raadinayo waddo horay loogu sii socdo oo ku saabsan arrimaha muhiimka ah ee qaranka,” ayaa lagu yiri bayaanka.

Howlgalka ayaa ku boorriyay dhammaan dhinacyada ay khusayso inay wada-hadallada uga qayb galaan si niyad-sami ah, iyagoo xoogga saaraya in danta shacabka Soomaaliyeed ay noqoto mudnaanta koowaad. UNTMIS ayaa sidoo kale xustay in wada-hadal dhab ah iyo ka-qaybgal loo dhan yahay ay lagama maarmaan u yihiin xallinta murannada siyaasadeed ee socda.

Iyadoo dib u xaqiijinaysa sida ay uga go'an tahay geeddi-socodka nabadda, ayay Qaramada Midoobay sheegtay inay diyaar u tahay inay garab istaagto dadaallada ay hoggaaminayaan Soomaalida, iyadoo kaashanaysa saaxiibada caalamka, si loo gaaro is-afgarad siyaasadeed iyo xasillooni waarta.

Baqaan wada-hadal ee uu horay u soo saaray Madaxweynaha Soomaaliya ayaa horay u helay taageerada Midowga Yurub. Si kastaba ha ahaatee, hoggaanka Golaha Mustaqbalka Soomaaliya — oo ah madal weyn oo ay ku midoobeen mucaaradku — ayaan weli soo saarin jawaab rasmi ah oo ku aaddan inay aqbaleen ama diideen casuumaadda.

GAROWE ONLINE