Sheekh Shariif: "Xasan Sheekh Waxa Uu Taagan Yahay Halkii Uu Ka Bilaaban Lahaa Dhicitaankiisa"

MUQDISHO, Soomaaliya — Madaxweynihii hore ee Soomaaliya, Shariif Sheekh Axmed, ayaa si adag u dhaleeceeyey Xasan Sheekh Maxamuud, isaga oo ku eedeeyey inuu ku xad-gudbay dastuurka dalka. Tallaabadan ayaa timid ka dib markii Xasan Sheekh uu sheegay in muddo-xileedkiisu uu sii socon doono ilaa 15-ka May 2027.

Shariif Sheekh Axmed ayaa sheegay in Soomaaliya ay gashay marxalad siyaasadeed oo khatar ah, wuxuuna ku baaqay in la helo heshiis siyaasadeed oo loo dhan yahay oo ku saabsan doorashada, isaga oo meesha ka saaray wax uu ku tilmaamay isku-dayo muddo-kordhin ah.

"Waa nasiib darro in qof labo jeer madaxweyne soo noqday, hestana shahaadada PhD uu fahmi waayo in waqtigiisii uu dhammaaday, uuna lagama maarmaan yahay heshiis doorasho," ayuu yiri Sheekh Shariif oo la hadlayey taageerayaashiisa, hadalkaas oo sii huriyey xiisadda u dhaxaysa dowladda iyo mucaaradka.

Madaxweynihii hore ayaa caddeeyey in mucaaradku ay isticmaalayaan waddooyin sharci iyo kuwo siyaasadeed, halkii ay dooran lahaeen iska horimaad hubeysan.

"Ma sidanno hub, waxaan sidnaa sharciga," ayuu yiri, isaga oo intaas ku daray in khilaafaadka dalka jira lagu xalliyo wada-hadal iyo hab-raacyada dastuurka, halkii loo isticmaali lahaa awood ciidan.

Shariif Sheekh Axmed ayaa sidoo kale xusay in isaga iyo Madaxweynaha Puntland, Siciid Cabdullaahi Deni, ay walaac weyn ka muujiyeen jihada siyaasadeed ee dalka, wuxuuna ka digay nooc kasta oo muddo-kordhin ah oo loo sameeyo maamulka hadda jira.

"Maanta, marka uu istaago oo uu yiraahdo hal sano ayaan ku darsaday muddo-xileedkayga, waxaan rumeysanahay inuu taagan yahay dhab ahaantii halkii uu ka bilaaban lahaa burburkiisa siyaasadeed," ayuu ka digay Shariif.

Sheekh Shariif ayaa iska fogeeyey wax kasta oo cabsi-gelin ah oo uga imaan kara ciidamada amniga ee dowladda, wuxuuna sheegay in madaxda mucaaradka aysan ka baqayn baabuurta gaashaaman ama ciidamada hubeysan. "Waxaan nahay dad aaminsan Allah, kuna kalsoon waxa ay u taagan yihiin," ayuu raaciyey.

Ugu dambeyntii, wuxuu dowladda ku eedeeyey caburin siyaasadeed iyo xadhig sharci-darro ah oo lagu hayo dadka dhaleeceeya nidaamka, isaga oo sheegay in dhallinyaro iyo siyaasiyiin loo xiray oo keliya inay ka horyimaadeen maamulka. Wuxuu hoosta ka xariiqay in dhibaatada taagan aysan ahayn mid qabiil, balse ay tahay khilaaf dastuuri ah iyo mid siyaasadeed oo saameynaya mustaqbalka Soomaaliya.

"Waxaan rabnaa inaan dalkayaga ka badbaadinno sharci-darro, awood sheegasho iyo caburin," ayuu hadalkiisa kusoo gaba-gabeeyey.

Hadalkan ka soo yeeray Shariif Sheekh Axmed ayaa ku soo beegmaya xilli ay cirka isku sii shareerayaan xiisadaha siyaasadeed ee Soomaaliya, kuwaas oo salka ku haya ismari-waaga ku saabsan doorashooyinka, isbeddelka dastuurka, iyo sharciyadda muddo-xileedka hay'adaha federaalka.

GAROWE ONLINE