Shirka Xalane oo soo dhammaaday iyo Mucaaradka oo isugu tegaya Hotel Airport

MUQDISHO - Wajigii koowaad ee wada-hadalladii xasaasiga ahaa ee ka socday xerada Xalane ayaa goordhow soo gabo-gaboobay, kadib markii ay muddo 4 saacadood ah foodda isku hayeen Madaxweyne Xasan Sheekh iyo madaxda mucaaradka.

Xaaladda hadda taagan:

Shirka Xalane: Waxaa dhinac fadhiyay Madaxweynaha iyo Ra’iisul Wasaare ku-xigeenka, halka dhinaca kalena ay wakiil ka ahaayeen Madaxweyne hore Sheekh Shariif iyo Madaxweynaha Puntland Siciid Deni.

Kulan cusub: Madaxdii mucaaradka ee shirka ku matalaysay dhinaca kale ayaa hadda u soo jiheystay Hotel Airport, halkaas oo ay xubnaha kale ee mucaaradka warbixin uga siin doonaan wixii ka dhacay gudaha Xalane.

Saacadda la sugayo: Shirka Airport-ka ayaa la filayaa inuu bilaawdo 2:30 duhurnimo, waxaana la filayaa in markaas kadib ay soo baxaan xogta dhabta ah ee ku saabsan waxyaabihii laysku afgartay ama laysku mari waayay.

Weli ma jirto war rasmi ah oo ka soo baxay labada dhinac, balse indhaha oo dhan ayaa hadda ku wajahan kulanka ka furmaya Hotel Airport si loo ogaado jihada ay aadeyso doorashada dalku.

GAROWE ONLINE