Soomaaliya oo u yeertay Safiirka Kenya kadib markii Wasiir loo diiday gelitaanka Kenya

MUQDISHO, Soomaaliya — Dowladda Federaalka Soomaaliya ayaa la sheegay inay u yeertay safiirka Kenya u fadhiya Muqdisho, kaddib markii la sheegay in Wasiiru Dowlaha Madaxtooyada, Abshir Bukhaari, loo diiday inuu galo Kenya, islamarkaana dib loogu celiyay Muqdisho.

Sida lagu sheegay wararka, saraakiisha socdaalka Kenya ayaa su'aalo ka keenay baasaboor Kenyan ah oo la sheegay inuu watay Bukhaari.

Dhacdadan ayaa la filayaa inay sii xoojiso xiisadda diblomaasiyadeed ee u dhexeysa labada dal ee deriska ah, kuwaas oo bilihii u dambeeyay soo maray khilaafaadyo isdaba joog ah oo saameeyay xiriirkooda siyaasadeed.

Sida ay baahiyeen warbaahinta caalamiga ah, oo ay ku jiro Bukhaari ayaa lagu hakiyay Garoonka Caalamiga ah ee Jomo Kenyatta (JKIA) ee magaalada Nairobi, ka hor inta aan lagu amrin inuu dib ugu laabto Muqdisho. Ilaa iyo hadda ma jirto faahfaahin rasmi ah oo laga bixiyay sababta keentay go'aankaas.

Dhacdadan ayaa timid wax ka yar bil kaddib markii sidoo kale la sheegay in Ra’iisul Wasaare Ku-xigeenka Soomaaliya, Jibriil Cabdirashiid Xaaji, loo diiday inuu galo Kenya, iyadoo lagu eedeeyay inuu si sharci darro ah ku helay baasaboor Kenyan ah.

Ilaa hadda, dowladaha Soomaaliya iyo Kenya midkoodna si rasmi ah ugama hadlin wararka sheegaya in Bukhaari loo diiday gelitaanka Kenya ama in safiirka Kenya loogu yeeray Wasaaradda Arrimaha Dibadda Soomaaliya si wax looga weydiiyo arrintan.

Haddii wararkan la xaqiijiyo, waxay noqon doontaa dhacdadii labaad muddo ka yar hal bil gudaheed oo mas’uul sare oo ka tirsan dowladda Federaalka Soomaaliya loogu diido gelitaanka Kenya, arrintaas oo sii kordhin karta xiisadda diblomaasiyadeed ee u dhexeysa labada dal.

GAROWE ONLINE