Wasiirka Gaashaandhigga oo booqday saldhigga ciidamada Itoobiya ee Baydhabo

BAYDHABO - Axmed Macallin Fiqi, Wasiirka Gaashaandhigga Xukuumadda Federaalka Soomaaliya, ayaa booqday xarunta Qeybta 3-aad ee Howlgalka Taageerada iyo Xasilinta Midowga Afrika ee Soomaaliya (AUSSOM) ee magaalada Baydhabo, halkaas oo ay ku sugan yihiin ciidamada Itoobiya ee qeybta ka ah howlgalka.

Wasiirka ayaa kulan la qaatay Taliyaha Qeybta 3-aad, Teklu Hurisa Janka, isaga oo ka dhageystay warbixin ku saabsan hawlaha qeybta, horumarka hawlgallada iyo wada-shaqeynta ka dhaxeysa Ciidanka Xoogga Dalka Soomaaliyeed iyo ciidamada Itoobiya ee ka tirsan AUSSOM ee ka hawlgala deegaannada Koonfur Galbeed. 

Wasiir Fiqi ayaa uga mahadceliyay ciidamada Itoobiya doorka ay ku leeyihiin taageeridda hawlgallada ciidanka qaranka iyo dadaallada lagu xaqiijinayo amniga iyo xasilloonida dalka, isaga oo carrabka ku adkeeyay muhiimadda sii xoojinta hawlgallada wadajirka ah ee lagula dagaallamayo argagixisada. 

Booqashadan ayaa qayb ka ah dadaallada Wasaaradda Gaashaandhigga Soomaaliya ee lagu xoojinayo xiriirka saaxiibbada caalamka, gaar ahaan howlgalka AUSSOM, si loo dardargeliyo guulaha laga gaarayo la-dagaallanka argagixisada iyo xoojinta hawlgallada wadajirka ah. 

GAROWE ONLINE