Xamse: Saaxiibkay Laftagareen ma uusan rabin in taariikhdiisu ku dhammaato sida hadda dhacday

MUQDISHO - Ra’iisul Wasaaraha Soomaaliya, Xamsa Cabdi Barre, ayaa Isniintii sheegay in dowladda federaalka aysan aqbali doonin doorasho dadban, saacado yar kadib markii Ciidanka Xoogga Dalka Soomaaliyeed ay la wareegeen magaalada Baydhabo.

Isagoo ka hadlayay Muqdisho, Ra’iisul Wasaaraha ayaa sheegay in xaaladda amni ee Baydhabo ay “si buuxda gacanta ugu hayaan” ciidamada dowladda, wuxuuna meesha ka saaray suurtagalnimada in dib loogu laabto nidaamka doorashooyinka dadban ama ku saleysan beelaha.

“Baydhabo waxay ku jirtaa gacanta Dowladda Federaalka. Ma jiri doonaan doorashooyin dadban, wax kasta oo horseedi kara aano qabiilna lama aqbali doono,” ayuu yiri Ra’iisul Wasaaruhu.

Hadalkan ayaa yimid wax yar kadib markii Madaxweynaha Koonfur Galbeed, Cabdicasiis Xasan Maxamed (Laftagareen), uu Facebook ku shaaciyay iscasilaaddiisa, maalmo kadib markii mar kale loo doortay xilka muddo shan sano ah doorasho ay dowladda federaalka diidday. Wararka ayaa tilmaamaya in Laftagareen uu heshiis la gaaray Muqdisho oo ku saabsan wareejinta talada iyo inuu ka baxo magaalada. 

Xamsa Cabdi Barre ayaa si toos ah ula hadlay Laftagareen, isaga oo muujiyay ka xumaansho sida uu ku dhammaaday waqtigiisii hoggaamineed.

“Saaxiibkay Cabdicasiis Laftagareen ma uusan rabin in taariikhdiisu ku dhammaato waxa maanta dhacay, balse nasiib darro sidaas ayay ku dhammaatay,” ayuu yiri.

Ra’iisul Wasaaraha ayaa sidoo kale dhaliilay siyaasiyiinta mucaaradka ah ee hambalyeeyay Laftagareen kadib dib-u-doorashadiisa, isaga oo sheegay in taageeradoodu aysan wax weyn ka dhignayn.

“Siyaasiyiinta hambalyeeyay nin is doortay laba saacadood waxay lahaayeen wixii ay lahaayeen. Haddii intaas kaliya ahayd, cashar wanaagsan ayaan ka baranay,” ayuu yiri. 

Dhanka kale, Xamsa ayaa qiray doorkii hore ee Laftagareen ku lahaa arrimo qaran, oo ay ku jiraan geeddi-socodka cafinta deymaha Soomaaliya, dib-u-eegista dastuurka, iyo wadahadallada ku saabsan u gudbidda nidaamka doorashada qof iyo cod.

Khilaafka ka taagan Koonfur Galbeed ayaa ah mid muujinaya cadaadiska ka jira nidaamka federaalka ee jilicsan, halkaas oo murannada la xiriira doorashooyinka iyo awood qaybsiga u dhexeeya Muqdisho iyo maamul goboleedyada ay marar badan abuuraan khilaaf siyaasadeed.

Iyadoo ciidamada federaalka ay hadda gacanta ku hayaan Baydhabo, isla markaana la magacaabay madaxweyne ku-meel-gaar ah, indhaha ayaa ku sii jeeda sida dowladda federaalka u maareyn doonto kala-guurka iyo in dib-u-heshiisiin siyaasadeed oo ballaaran ay ka hortagi karto xasillooni darro hor leh. 

GAROWE ONLINE