Xasan Sheekh oo Beesha Caalamka kala hadlay khilaafka doorashooyinka Soomaaliya

MUQDISHO — Madaxweynaha Soomaaliya Xasan Sheekh Maxamuud ayaa Maanta la kulmay wakiillo ka socda beesha caalamka, iyadoo kulanka diiradda lagu saaray xiisadda siyaasadeed ee ka taagan hannaanka doorashooyinka dalka iyo dadaallada lagu xallinayo khilaafka u dhexeeya dowladda Federaalka iyo mucaaradka.

Kulankan ayaa yimid maalin kadib markii wakiillada beesha caalamka ay la kulmeen hoggaamiyeyaasha mucaaradka, kuwaas oo ay kala hadleen sidii loo yareyn lahaa ismari-waaga siyaasadeed loona heli lahaa is-afgarad ku saabsan hannaanka doorashada.

Sida ay sheegeen ilo xog-ogaal ah, Madaxweyne Xasan Sheekh ayaa diblomaasiyiinta u sharxay qorshaha dowladda Federaalka ee doorashooyinka, kaas oo ku saleysan hirgelinta doorasho qof iyo cod ah oo dalka oo dhan laga qabto.

Dowladda Federaalka ayaa ku adkeysaneysa in xildhibaannada baarlamaanka soo socda lagu soo doorto doorasho toos ah, si loo beddelo nidaamka doorashada dadban ee Soomaaliya ay ku dhaqmeysay sannadihii la soo dhaafay.

Dhanka kale, mucaaradka ayaa ku baaqaya in marka hore la gaaro is-afgarad siyaasadeed oo loo dhan yahay, iyagoo ka digaya in khilaafaadka aan la xallin ay sii adkeyn karaan xaaladda siyaasadeed ee dalka.

Kulamadan diblomaasiyadeed ayaa muujinaya dadaallada sii kordhaya ee beesha caalamka ay ku dooneyso inay dhiirrigeliso wadahadal u dhexeeya dhinacyada siyaasadda Soomaaliya si loo gaaro heshiis ku saabsan hannaanka doorashooyinka dalka.

GAROWE ONLINE