Xiisada siyaasadeed ee Koonfur Galbeed oo ku dhow gacan ka hadal

Saraakiil ciidan oo la magac-baxay "Badbaadada Koonfur Galbeed" ayaa kasoo horjeestey "ku darsiga" Laftagareen.

BAYDHABO, Koonfur Galbeed - Saraakiil ciidan oo la magac-baxay "Badbaadada Koonfur Galbeed" ayaa Isniinta maanta ah waxay shir jaraa'id ku qabteen gudaha xarunta ku meelgaarka ah ee dowlad goboleedka ee Baydhabo.

"Muddo kororsiga aan dastuuriga ahayn" madaxwayne Cabdicasiis Xasan Maxamed Laftagareen u sameeyay baarlamaanka maamulkaas ayay sheegeen in ay kasoo horjeedaan.

Qabashadda doorasho heshiis lagu yahay oo waqtigeeda ku dhacda ayay ku baaqeen "kahor inta xaaladda faraha ka bixin". Digniintan ayaa loo fasirtey in xaalada isku-rogi karta gacan ka hadal.

"Madaxwayne Laftagareen waxaan leenahay saaxiibkeena ayaa tahay, ha isku-dayin handadaada iyo qori, waxa aad raadineyso inta aad iska daysid doorasho si nabad ah ku qabo," ayay tibaaxeen.

Midowga Murashaxiinta madaxtinimada Koonfur Galbeed oo dhowaan shir degdeg ah ku yeeshay magaala madaxda Muqdisho ayaa si adag u qaadacay qodobadii kasoo baxay wadahadaladii guddoomiye Aadan Madoobe iyo madaxwayne Laftagareen.

Heshiiskaas ka koobnaa lixda qodob ayay ku tilmaameen “go'aano dib—u—dhigaya dib-u-heshiisiinta la filayay kahor dhamaadka muddo xileedka" hogaamiyaha Koonfur Galbeed.

Hogaanka maamulka xaruntisa ku meelgaarka ah ay tahay magaaladda Baydhabo ayay ku eedeeyeen "afduubka iyo caburinta siyaasiyiinta iyo murashaxiinta".

"Waxaan wali Koonfur Galbeed ka jira dhaqankii ay shantii sano lasoo dhaafay shacabka iyo siyaasiyiinta Soomalaiyeed ay ka dhiidhinayeen sidda caburin, caga-jugleyn iyo is-hortaaga hogaamiyeyaasha siyaasada," ayay sheegeen.

GAROWE ONLINE