Madaxweyne Farmaajo oo Shir ku casuumay Madaxda maamullada

MUQDISHO, Soomaaliya - Madaxweynaha Jamhuuriyadda Federaalka Soomaaliya Mudane Maxamed Cabdullaahi Maxamed Farmaajo ayaa martiqaad u diray Madaxda Dowlad Goboleedyada xubnaha ka ah Dowladda Federaalka Soomaaliya si ay uga soo qeybgalayaan shir wadatashi ah oo ka dhacaya magaalada Muqdisho 28ka Oktoobar, 2017.

Shirkaas ayaa looga arrinsan doonaa hawlo muhiim ah oo horyaalla qaranka, ayna ugu horreyso sidii musiibadii Qaran ee ka dhacday magaalada Muqdisho 14kii bisha Oktoobar 2017 loogu beddali lahaa midnimo Qaran.

Qodobada kale ee diirada lagu saari doono shirkaan waxaa kamid ah sidii loo xoojin ahaa wadashaqeynta Dowladda Federaalka iyo Dowlad Goboleedyada xubnaha ka ah.

Sidoo kale, waxaa shirkaas looga wada hadli doona arrimo muhiim u ah hanaanka dowladnimada Soomaaliya oo ku jirta marxalad soo kabasho ah.

Qodobadaan ayaa ah kuwa fulintooda iyo hirgalintoodu ay u baahan tahay wadajir iyo wadashaqeyn, waxaana ka mid ah dardargelinta nabadeynta dalka, horumarinta hannaanka federaalaynta, dib u eegista dastuurka, habka qeybsiga kheyraadka dalka iyo geeddi socodka doorashada 2020.

Casuumadda shirkaan ayaa timid maalin kadib markii madaxda Maamulada Soomaaliya ku eedeeyeen dowlada Federaalka ah in faraglin ku hayso arimaha gudaha maamulada islamrkaana ka shaqeyneyso sidii Madaxweynaasha maamulada Galmudug iyo Koonfur Galbeed ku badali laheyd.

Madaxda maamulada ayaa warmutiyeedka ay soo saareen 21 Oct, 2017 Halkaan Ka Akhri ku sheegey in nidaamkii Federaalka Soomaaliya uu khatar ku jiro.

Hoos Ka Akhri Qoraalka Madaxweynaha Soomaaliya

GAROWE ONLINE