Al-Shabaab oo Qarax ka fulisay dalka Kenya - Fahfaahin

GARISSA — Sideed askari oo ka tirsan Ciidanka Ilaalada Xuduudaha ayaa ku dhaawacmay Talaadadii kadib markii gaarigii ay wateen oo ah nooca gaashaaman uu ku qarxay miino, deegaanka u dhexeeya Kiwanja iyo Yumbis ee degmada Fafi, gobolka Garissa ee Waqooyi Bari Kenya.

Qaraxan ayaa ka dhacay qiyaastii 10 kiiloomitir u jirta magaalada Yumbis xilli ciidamadaasi ay ku jireen kormeerka joogtada ah ee deegaanka. Mas’uuliyiinta ammaanka ayaa ku tuhunsan in miinada ay dhigeen dagaalyahanno ka tirsan kooxda Al-Shabaab oo ku sugan gobolkaasi.

Guddoomiyaha gobolka Garissa, Mohamed Mwabudzo, ayaa xaqiijiyay weerarka, isaga oo sheegay in dhammaan ciidamada dhaawacmay la gaarsiiyay xarumo caafimaad isla markaana ay xaaladoodu tahay mid deggan.

Kadib weerarka, waxaa la bilaabay hawlgallo wadajir ah oo ay fuliyeen ciidamada ammaanka si loo raadiyo dambiilayaasha iyo in la hubiyo in aysan jirin khataro kale oo deegaanka ku sugan.

Weerarkan ayaa kusoo beegmaya iyadoo ay sii kordhayaan falalka amni-darro ee ay ka wadaan kooxaha xagjirka ah xuduudaha Waqooyi Bari Kenya, gaar ahaan gobollada Garissa, Mandera, Lamu iyo kuwa la deriska ah.

Bishii hore, toddobo askari ayaa ku dhaawacmay 8-dii Luulyo kadib markii gaarigii ay wateen uu la kacay miino kale oo IED ah, taasoo ka dhacday wadada u dhaxeysa Gadudia iyo Laga ee Mandera Bari, gobolka Mandera.

GAROWE ONLINE