Caabuqa ka dilaacay Shiinaha oo soo gaarey Geeska qaarada Afrika
-
WARIYAHA ADDIS ABABA GAROWE ONLINE
- Posted On 28-01-2020, 08:43PM
ADDIS ABABA, Ethiopia – Qaar kamid ah dowladaha Geeska qaaradda hodanka ah ee Afrika ayaa xaqiijiyey in ay baareen kiisas la xiriira cudurka dilaaga ah ee ka dilaacay dalka Shiinaha.
Wasaaradda Caafimaadka Itoobiya ayaa sheegtay in ay karan-tiileen saddex qof oo lagu tuhmay in uu ku dhacay vayruskaas.
Saddexda ruux oo laga qabtay garoonka diyaaradaha magaalada Addis Ababa ayaa ka yimid mid kamid ah magaalooyinka lagu helay caabuqa.
Dhanka kale, Kenya ayaa hubin ku wada qof looga shakiyey cudurkan oo laga qabtay garoonka diyaaradaha caasimadda Nairobi.
Ruuxaan oo la qariyey magaciisa ayaa la sheegay in uu yahay arday ka yimid Shiinaha, wallow aan la xaqiijin in uu hayo xanuunkaas.
La tuhunsanaha ayaa la dhigay Kenyatta National Hospital, waxaana xaaladiisa caafimaad si gaar ah ula tacaalaya dhakhaatiir.
Afrika, dalal uu kamid yahay Ivory Coast ayaa shaaciyey in ay gacanta ku dhigeen kiisas la xiriira dad uu ku dhacay cudurkan dilaaga ah.
Hase ahaatee, wadamada Kenya iyo Itoobiya ayaa noqonaya dalalkii ugu horeeyay ee Geeska Afrika ee xanuunkaan laga soo wariyo.
In ka badan 80 ruux ayaa illaa iyo haatan la xaqiijiyey in uu dilay xanuunkaan. Badi dadkan waxay ku nool yihiin China. Intaas waxaa wehlisa in uu ku dhacay tirro kor-u-dhaafeysa laba kun.
GAROWE ONLINE
