Dilal wadareedyo mar kale kasoo cusboonaaday waddanka Suudaan

Colaadda Suudaan ee soconeysa mudada 18-ka bilood ah ayaa waxaa ku dhintay tobanaan kun oo qof.

KHARTUUM, Suudaan - Sarkaal sare oo ka tirsan Qaramada Midoobay oo ku sugan dalka Sudan ayaa sheegtay inay aad uga xun tahay wararka sheegaya "dambiyada foosha xun" ee ka dhacay bartamaha gobolka Gezira, oo ay ku jiraan dad rayid ah oo ay laayeen ciidamada Rapid Support Forces (RSF).

Hadalka Clementine Nkweta-Salami ayaa yimid ka dib markii koox u ololeysa bini'aadantinimada ay sheegtay in ugu yaraan 124 qof ay RSF ku dishay weeraro ay ku qaaday tuulooyin usbuucii la soo dhaafay.

RSF ayaa beenisay in ay beegsatay dadka rayidka ah, iyadoo sheegtay in dagaalyahanadeeda ay isku dhacayaan maleeshiyaad hubeysan oo ay ciidamadu wataan.

Colaadda Suudaan ee soconeysa mudada 18-ka bilood ah ayaa waxaa ku dhintay tobanaan kun oo qof, waxaana ku barakacay in ka badan 11 milyan oo qof.

Colaadda Suudaan ayaa billowday Abriil 2023 ka dib markii ay isku dhaceen taliyeyaasha RSF iyo militariga, Gen Mohamed Hamdan Dagalo iyo Gen Abdel Fattah al-Burhan siday u kala horreeyaan.

Labaduba waxay si wada jir ah u sameeyeen afgambi 2021, taas oo meesha ka saartay u guuritaanka Suudaan ee dimoqraadiyadda, laakiin ka dib waxay galeen loolan awoodeed oo xun.

Sikastaba ha ahatee, Labada hogaamiye ayaa diiday inay saxiixaan heshiis nabadeed, inkastoo Mareykanka iyo Sacuudiga ay isku dayeen inay soo afjaraan colaada.

GAROWE ONLINE