Gudoomiyihii la xiray ee Nairobi oo xayiraad lagu soo rogay
-
WARIYAHA NAIROBI GAROWE ONLINE
- Posted On 12-12-2019, 09:26AM
NAIROBI, Kenya – Maxkamadda la dagaalanka musuqmaasuqa ee dalka Kenya ayaa damaanad kusii deysay gudoomiyihii la xiray ee Nairobi, Mike Sonko.
Kahor inta aan lasii deyn, Sonko ayaa bangiga dowladda ku shubay aduun lacageed dhan 150-kun oo Doollar, taasoo damaanadda ah.
Dhinaca kale, garsooreyaasha ayaa isku raacay in Sonko uusan xafiiska u shaqo tegi karin inta laga soo gabagabeynayo dacwadda ka dhanka ah.
Sonko, oo 44-jir ah, ayaa Jimcadii lasoo dhaafay loo xiray eedeymo ku aadan in uu musuqmaasuqay 3-milyan oo Doollar-ka Mareykanka.
Barasaabka magaala madaxda Kenya oo beeniyay eedeymaha loo jeediyey ayaa ku sifeeyay kuwa salka ku haya dano siyaasadeed.
Damaanad kusii deynta iyo xayiraadda ayaa imaaneysa xili Isniintii isbitaal loola cararay kadib xanuun xabadka ah oo lasoo darsey isagoo xabsiga ku jira.
Dowladda madaxweyne Uhuru Kenyatta ayaa waxay sarre u qaadey dagaalka ka dhanka ah musuqmaasuqa oo maxkamad loosoo taagey mas'uuliyiin sar-sarre.
GAROWE ONLINE
