In ka badan 60 rayid ah oo lagu dilay galbeedka Itoobiya

ADDIS ABABA, Ethiopia – In ka badan 60 ruux ayaa lagu dilay weeraro kasoo cusboonaadey tuuladda Dibate Wereda, aaga Metekel ee gobolka Banishangul Gumuz ee dhaca Galbeedka waddanka Itoobiya.

Laanta Af-Amxaariga ee VOA-da ayaa warisay in weeraradaas ay ka dambeeyeen kooxo hubeysan. Balse, midkoodna – ismaamulka iyo xafiiska warfaafinta aaga Meteke wali wax war ah kama soo saarin falkaas.

Saddex todobaad kahor ayay ahayd markii ku dhowaad 50 ruux lagu laayey isla aagaas. Dilalkaa waxaa lala xiriiriyey loolan qowmiyad.

Xukuumadda Ra'iisul Wasaare Abiy Axmed ayaa ciidamo dheeraad ah u dirtay aagaas kadib dilalkaas kuwaas oo la wareegay ammaanka isla markaana taliye looga dhigay Gaashaanle Sarre Asrat Denero.

Dhacdooyinkaan ayaa kusoo hagaagaya xilli ciidamadda federaalka Itoobiya ay gobolka waqoyga dhaca ee Tigray ay kawadaan howlgal ay ku goobayaan wax ay ugu yeereen haraadiga hogaanka jabhada TPLF.

TPLF ayaa in muddo ah ka talin jirtay gobolka Tigray, balse waxaa bishii November, 2020 soo afjaray Abiy oo guluf ku qaadey.

Gulufkaas sababay geerida boqolaal iyo barakaca malaayiin Itoobiyaan ah ayaa ka dambeeyay markii hogaanka TPLF ay kasoo horjeesteen qorshaha ay doorashooyinka baarlamaanka ku baajisay dowlada.

Doorashooyinka ayaa haatan la qorsheynayaan in ay dhacaan bartamaha sanadkan 2021-ka. Balse, hubanti la’aanta waxay ka taagan tahay hadii ay guud ahaan Itoobiya uga qabsoomi doonto qaab nabdoon.

GAROWE ONLINE