Juma: Ciidamada Kenya kama baxayaan Soomaaliya

NAIROBI, Kenya – Ciidamada Kenyaanka ee Soomaaliya ku jooga magaca howlgalka Midowga Afrika ee AMISOM ayaan dalkooda dib ugu laaban doonin illaa qadiyada laga wadahadalo qaraarna ku ansixiyo Golaha Ammaanka Qaramada Midoobay, sidda ay sheegtay Wasiirka Difaaca waddanka Kenya, Monica Juma.

Juma oo Talaadadii daaha ka rogtay in Kenya aysan go'aamin karin bixitaanka askartaas nabad-ilaalinta ah ayaa hoosta ka xariiqdey in howlgaladda AMISOM aysan khuseyn xiriirada labada geesoodka wadamada ay kasoo kala jeedaan.

"Bixitaanka wuxuu ku imaan karaa amarka Midowga Afrika. Ma nihin kuwa go'aamin kara in ay joogaan ama baxaan iyo waqtiga," ayay Juma u sheegtay wariyeyaasha xilli ay ka hadleysay Xerada Tababarka UK ee waddanka Kenya.

Socdaalka xerada waxaa ku wehliyey xoghayaha gaashaandhiga Mareykanka, Ben Wallace, kaas oo socdaal ku maraya wadamada Afrika oo Soomaaliya ku jirto.

Wallace iyo Juma ayaa taageero u muujiyey ciidamadda Kenyaanka ee Soomaaliya u jooga la dagaalanka maleyshiyadda Al-Shabaab ee xiriirka la leh Al-Qaacidda.

Ciidamadda Kenya ee qeybta ka ah howlgalka Midowga Afrika ee AMISOM ayaa tiradooda waxaa lagu qiyaasaa ku dhowaad saddex kun, waxaana badankooda ay ku sugan yihiin gobolada Jubooyinka oo xuduud uu la leh waddankooda.

Dowladda Soomaaliya ee haatan jirta ayaa la fahansan yahay in xiriirka aan fiicneyn ee kala dhaxeeya Kenya awadeed ay daaha gedaashiisa ka wado cadaadis dalka looga saarayo ciidamada dalkaas ee qeybta ka ah howlgalka AMISOM, wallow aysan gaari karin go’aanka ugu dambeeya ee bixitaanka askartaas.

GAROWE ONLINE