Koonfur Afrika oo dacwad ka ah Yahuuda u gudbisay ICJ

Dacwadan ayaa waxa ay ku saabsan tahay in Isra'iil ay Gaza ka waddo xasuuq bini'aadanimo.

NAIROBI, Kenya - Koonfur Afrika ayaa waxay maxkamadda caalamiga ah ee cadaaladda (ICJ) u gudbisay dacwad ku saabsan in Israa'iil ay "xasuuq" ka waddo Gaza.

Maxkamadda Qaramada Midoobay ayaa xaqiijisay codsiga ku saabsan xadgudubyada lagu eedeeyay ee ah waajibaadka Israa'iil ee hoos yimaada Axdiga Xasuuqa.

Israa'iil ayaa si adag u diiday eedeynta, waxayna ku tilmaantay "mid aan sal iyo raad toona lahayn".

"Israa'iil waxay si xun u diidday been-abuurka dhiigga ee ay faafisay Koonfur Afrika," ayay tiri wasaaradda arrimaha dibadda Yahuuda.

Ka dib codsigii ay u gudbisay maxkamadda ICJ, madaxtooyada Koonfur Afrika ayaa bayaan ay soo saartay ku sheegtay in waddanku uu waajib ku yahay "inuu ka hortago xasuuqa inuu dhaco".

Maxkamadda ICJ, oo fadhigeedu yahay magaalada Hague ee dalka Holland, ayaa ah hay’adda Qaramada Midoobay u qaabilsan garsoorka.

ICJ ayaa waxa ay xallisaa khilaafaadyada u dhexeeya dawladaha xubnaha ka ah ee dunida waxayna ka bixisaa talo-bixin ku saabsan arrimaha sharciga caalamiga ah.

GAROWE ONLINE