Koox xiriir la leh ISIL oo 10 qof ku dishay dalka Uganda
-
WARIYAHA NAIROBI GAROWE ONLINE
- Posted On 21-12-2023, 01:45PM
NAIROBI, Kenya - Maleeshiyo xiriir la leh kooxda Daacish ayaa gubay ugu yaraan 10 qof oo rayid ah kadib weerar ay ku qaadeen magaalo ku taalla Koonfur-Galbeed ee Uganda, sida ay booliisku sheegeen Talaadadii.
Dableydan oo ka tirsan xoogaga Allied Democratic Forces (ADF) ayaa ka tallaabay xadka si ay u weeraraan xarun ganacsi oo ku taal Kamwenge, sida ay booliisku sheegeen.
"Natiijooyinka hordhaca ah waxay muujinayaan in 10 dabley oo ku hubeysnaa qoryaha SMG ay weerarka fuliyeen oo ay si ba'an u gubeen 10 qof," ayuu yiri afhayeenka booliiska gobolka Vincent Twesige.
Kooxda weerarka geysatay ayaa sidoo kale gubay mooto, waxayna bililiqeysteen bakhaar, sida uu sheegay Twesige.
Twesige waxa uu intaas ku daray in ciidamada Uganda la geeyay goobtan si ay u baacsadaan mintidiinta oo la aaminsan yahay in ay gacan-saar dhow la leeyihiin kooxda Daacish.
Weerarka oo dhacay abaare 2-dii subaxnimo ee Talaadadii ayaa ku soo beegmay maalmo ka dib markii madaxweynaha Uganda Yoweri Museveni uu sheegay in ugu yaraan 200 oo ka tirsan fallaagada ADF lagu dilay bishii Sebtembar.
ADF waxaa lagu asaasay Bariga DRC sanadkii 1995-tii. Kooxdan ayaa waxay noqotay midii dadka ugu badan dishay.Waxaa lagu eedeeyay xasuuq, afduub iyo dhac, iyadoo tirada dhimashada lagu qiyaasay kumanaan.
Bishii Juun, xubnaha maleeshiyada ADF ayaa waxay dileen 42 qof oo ay ku jiraan 37 arday kuwaasoo dhigata dugsi sare oo ku yaal Galbeedka Uganda oo u dhow xadka DRC, sidda ay sheegeen laamaha ammaanka dalkaas.
GAROWE ONLINE
