Loolanka Jabuuti iyo Kenya ee kursiga UN-ka oo weji cusub yeeshay

NAIROBI, Kenya – Maadaama ay aad u soo dhowaaneyso xiligii coddeynta, dowladdaha Jabuuti iyo Kenya ayaa waxay aad u xoojiyeen dedaalada ay ku baadigoobayaan taageerada dalalka caalamka.

Kenya ayaa waxay xaqiijisatay aqlabiyadda dalalka xubnaha ka ah Midowga Afrika, balse taas ma niyad-jebin Jabuuti oo taageero badan ka heshay dunida Muslimka iyo wadamada Faransiiska soo gumeystay.

Dowladahan oo baratankooda uu weji cusub yeeshay ayaa loolankooda waxay geeyeen shir madaxeedka waddamada ku bahoobay ururka NAM oo magaaladda Baku ee dalka Azerbaijan lagu soo xiray.

NAM ayaa ah urur caalami ah oo ay ku mideysan yihiin wadamadda aan dhinac-nna taageersaneyn ama dhex-dhexaadka ah.

Xukuumadda Nairobi ayaa shirkaas u dirsatay Ababu Namwamba, xoghayaha waaxda arrimaha dibadda Kenya, kaasoo shirar gaar-gaar ah la yeeshay madaxda kala gedisan.

Jabuuti ayaa waxaa dhankeeda kulankaas uga qeybgalay Ismaaciil Cumar Geelle, oo ah madaxweynaha waddankaas.

Dhinacyadda ayaa halkaas kasoo helay taageero kala duwan, iyadda oo mid walba uu sheeganayo guusha ugu balaran.

Hase ahaatee, waxay kala cadaan doonan cidda labinta hesha bisha June ee sanadka 2020-ka, oo ah waqtga coddeynta.

Kursiga ay isku hayaan dowladahan ayaa ah midka aan joogtada ahayn ee Afrika ku leedahay Golaha Ammaanka Qaramada Midoobay oo dhamaan wadamada xubnaha ka ah yihiin 15- dowladood.

Soomaaliya iyo inta badan dowladaha Islaamka ayaa horey ugu dhawaaqay in ay garab-taagan yihiin Jabuuti, taas oo wacad ku martay in aysan marnaba niyad-jebin doonin taageerada Afrika siisay Kenya.

GAROWE ONLINE