Madaxweyne markii afaraad isu karantiilay cabsi la xiriirta Covid-19

GABORONE, Botswana – Madaxweynaha Botswana, Mokgweetsi Masisi, waxaa Khamiista maanta ah u bilaabatay 14 maalin karantiil ah markii mas'uul si dhow ula shaqeynayey laga helay Covid19, sidda uu xaqiijiyey xafiiskiisa.

Andrew Sesinyi, xoghayaha joogtada ee dhanka warbaahinta xafiiska Masisi, ayaa sheegay in talaabadan loo qaadey "iyadoo la dhaqan-gelinayo shuruucda xakameynta Covid-19 gaar ahaan karantiilka".

Waa markii afaraad uu hogaamiyahan karantiil galo tan iyo markii kiiskii ugu horeeyay uu diiwaan-geliyey waddankaan dhaca koonfurta Afrika 30-ka bishii Maaj ee sanadkan aynu ku jirno ee 2020-ka.

Mas'uuliyiin kale oo ku dhowaa Masisi ayaa dhankooda is-godoomiyey, waxaana ay mareen baaritaan si loo xaqijiyey hadii ay qaadeen.

Qarankaan hodanka ku ah diamond-ka ayna ku nool yihiin 2.2 milyan oo dad ah ayaa illaa iyo hadda diiwaan-geliyey 227 kiis iyo hal geeri.

Sidda ay sheegtay waaxda caafimaadka, ugu yaraan 181 kamid ah kiisaskaas waa kuwa lasoo dhoofiyey oo la macno ah in ay ajaaniib yihiin.

Dowladda Botswana ayaa joogteysay wacyi-gelinta dadweynaha gaar ahaan kala fogaanshiyaha, farxalka, af-xirka iyo latacaalid deg-deg ah oo loo sameeyo dadka uu haleelo, waana mid kamid ah xeeladaha ay dalal ku guuleysteen.

GAROWE ONLINE