Qalbi dhagax oo si adag uga jawaabay hadalkii Cabdi Xaashi Cabdullaahi

NAIROBI, Kenya – Cabdikariin Muuse Qalbi dhagax ayaa markii ugu horeysay wuxuu si furan uga jawaabay hadalkii kasoo yeeray afhayeenka Aqalka Sare ee baarlamaanka Soomaaliya ee ku saabsanaa dhiibistiisa.

Qalbi dhagax oo wareysi gaar ah siiyey SSTV ayaa erayada kasoo yeeray Cabdi Xaashi Cabdullaahi ku tilmaamay "qiyaali iyo been abuur".

"Waxaasi waa been abuur iyo qiyaaligoodii, dadka dambiyadda galay ayaana lagu yaqaanaa," ayuu yiri, isagoo intaas ku daray: "Waxyaabo been abuur ah oo nafla-caarinimo ah in ay ku hadlaan baan lagu yaqaanaa".

Wuxuu raaciyey: "Waxaa la yiraahdaa neef la gowracay geedo kama waabto, waa neef la gowracay oo aan meelna ka waabanaynin".

Kadib wareysi uu siiyey Horufadhi Media, Cabdi Xaashi ayaa mas'uuliyadda dhiibista Qalbi dhagax ka weeciyey Farmaajo, isagoo dusha u saarey Cabdullaahi Sanbaloolshe, taliyihii sirdoonka Soomaaliya.

"Sanbaloolshe ayaa yiri Qalbi dhagax wuxuu wataa baasaboor Itoobiyaan ah, wuxuuna rabaa in uu isku dhiibo Ethiopia dowladda Soomaaliyana ay ka caawiso," ayuu xusay. "Isagaa sidaas yiri," ayuu ku adkeystay

Siyaasi Cabdiraxmaan Cabdishakuur Warsame oo hadalka Cabdi Xaashi aad uga soo horjeestay ayaa ku tilmaamay gudoomiyaha Sanate-ka "denbi qariye".

"Haddii Cabdi Xaashi uu waraysigan bixin lahaa maalmihii doodda kiiska Qalbidhagax taagnayd, waxaan la is oran lahaa waa ka daacad wuxuu sheegayo, laakiin isagoo xog-ogaal u ah xaqiiqada dhacdooyinka isdaba taxnaa ee kiiska Qalbidhagax in uu si ula kac ah masuuliyadda uga leexiyo madaxweynaha kuna eed tiro waxey dhaawacaysaa shakhsiyaddiisa, wuxuuna ku gabood falay xilka uu ummada u hayo, wuxuuna ku xadgudbay garaadka muwaadinka Soomaaliyeed," ayuu yiri hogaamiyaha xisbiga Wadajir.

Ugu dambeyntii, Qalbi dhagax, oo ka tirsanaa ciidamadda Soomaaliya ee dagaalkii 1977 la galay Itoobiya, ayaa ganafka ku dhuftay wararka sheegaya in xiligii la dhiibayey iyo hadaba uu haysto baasaboor Itoobiyaan ah.

GAROWE ONLINE