Qaylo-dhaan horleh oo kasoo yeertay Jaadleyda Kenya
-
WARIYAHA NAIROBI GAROWE ONLINE
- Posted On 11-05-2021, 08:19AM
NAIROBI, Kenya - Ganacsatada Qaadka miiraha Kenya ayaa shaaca ka dhigay in go'aankii ugu dambeeyay ee kasoo baxay dowladda Soomaaliya ay ku khasaareen $46,926.
Afhayeenka Ururka Ganacsatada Jaadleyda Nyambene ee Kenya, Kimathi Munjuri, ayaa sheegay in xamuulka miraha uu wali yaallo madaarka tan iyo subaxnimadii Isniinta.
Munjuri oo dowladdiisa ka dalbadey kaalmo ayaa ku eedeeyay qeyb ka mid ah dadka degaanka iyo ganacsatada inay ku dhaqmaan dacaayad si dib loogu bilaabo dhoofka maandooriyaha.
Wararku waxay xusayaan in Jaadleyda ay garoonka diyaaradaha Nairobi ka celiyeen 12 tan oo maandooriyahaas ah kadib go'aanka dowladda federaalka ah ee Soomaaliya.
Xukuumadda fadhigeedu yahay Muqdisho waxay xustey in wali aysan isbedelin siyaasadeeda Jaadka Kenya wallow labada dal soo celiyeen xiriirka diblumaasiyadeed.
Soomaaliya iyo Kenya ayaa Khamiista todobaadkii hore waxay dib u soo celiyeen xiriirka diblumaasi. Balse, wali ma aysna isla meeldhigin dhameystirka qodob Jaadka ku jiro.
GAROWE ONLINE
