Amaanka Duqa London oo sare loo qaaday kadib hanjabaado dil ah

Caalamka
By WARIYAHA LONDON , GAROWE ONLINE
Sadiiq Khaan, waa Muslimkii ugu horeeyay ee Maayar ka noqdo magaalooyinka reer Galbeed | Xuquuqda Sawirka: Online

LONDON, United Kingdom – Talaabo naadir ah, Duqa caasimada wadanka Ingiriiska ayaa qirtay in uu helay fariimo xadgudub iyo hanjabaadyo isugu jira.

Sadiiq Khaan, oo Muslim ah, ayaa talaabadaasi kadib waxaa la adkeeyay amaankiisa, isaga oo la siiyey ciidamo Boolis oo si gaar ah u ilaaliya.

"Dadkaasi waxba ima yeelin karaan, balse mararka qaar kama baaqsan kartid xaqiiqada in aan ka murugooday," ayuu u sheegay majaladda afka dheer ee Guardian.

Khan ayaa sanadkii 2018-kii waxa uu helay 278 fariimo oo cagajugleyn ah oo uga yimid dhinaca baraha bulshada, kuwaasi oo ay ku jiraan qaar dil ah.

"Ma lihi xuquuq aan ku walwalo, sababtoo ah in aan ahay duqa London iyo mid tusaale u ah Muslimiinta, Boolis ilaaliyo ayaan haystaa," ayuu raaciyey.

Tani ayaa kusoo beegmaysa xili Xildhibaano kale oo kamida baarlamaanka UK oo kasoo horjeeda ka bixitaanka Midowga Yurub ay qudhooda heleen fariimo goodis ah.

Intaasi waxaa wehlisa in mudaneyaasha dumarka oo si gaar ah loo beegsanayay loogu hanjabayey kufsi, dil iyo fadeexadeyn.

Sidda ku cad daraasad ay sameysay Jamaacadda London, 60% murashaxiinta Xildhibaanada ah ee doorashadii 2017-kii jir ahaan ayaa loogu xadgudbay.

Inta badan shaqsiyaadka la beegsanayo ayaa ah kuwa u ol'olaneynay in Afti kale oo ku aadan ka bixitaanka Midowga Yurub laga qaado dadweynaha.

Sikastaba ha ahaatee, Sadiiq Khan ayaa waxa uu noqday Muslimkii ugu horeeyay ee Maayar ka noqdo magaalo ka tirsan mid kamid ah dalalka ugu tunka weyn caalamka.

GAROWE ONLINE

Wararkii ugu dambeeyey