Shirqool ka dhan ah diblumaasiyiinta Mareykanka oo la fashiliyey

Caalamka
By WARIYAHA ARRIMAHA CAALAMKA , GAROWE ONLINE
Hay'adda Sirdoonka ayaa sheegtay in xabsi loo taxaabay shaqsiyaad lagu tuhunsan yahay weerarka dhicisoobay.

AMMAN, Jordan – Sirdoonka dalka Carbeed ee Jordan ayaa shaaca ka qaadey in uu fashiliyey weerar ka dhan ahaan ciidanka iyo diblumaasiyiinta Mareykanka.

Saraakiisha ayaa tilmaamay in sidoo kale shirqoolka lala damacsanaa diblumaasiyiinta maamulka Yahuuda ee waddankaas ku sugan.

Xoogaga lala doonayey gulufka ayaa ku sugan saldhig ku yaala koonfurta dalkaas, sidda lagu sheegay war-saxaafadeed.

Bayaanka oo kasoo baxay Hay'adda Sirdoonka ayaa lagu xusay in laba ruux ay abaabulayeen duulaanka, kuwaas oo ka tirsan Daacish.

Shaqsiyaadka la tuhunsan yahay oo la xiray bishii July ayaa qorsheeyay in ay gaari, mindi iyo rasaas u adeegsadaan weerarkooda.

Xubnahaan oo magacyadooda iyo jinsiyahooda aan lasoo bandhigin ayaa lasoo taagay Maxkamadda ciidamadda Ammaanka Jordan.

Sidda lagu sheegay warka qoraalka ah, eedeysaneyaasha ayaa lagu soo oogay dacwad argagixisinimo ah iyo dambiyo kale oo waaweyn.

Maxkamadda ay kasoo muuqdeen xubnahaan ayaa waxaa sharciyadeeda su’aal geliyey qaar kamida siyaasiyiinta iyo wadaadada ugu caansan waddankaas.

GAROWE ONLINE

Wararkii ugu dambeeyey