Murashaxiinta gudoonka xeer-dejinta KG oo la diiwaan-gelinayo

Soomaliya
By WARIYAHA BAYDHABO , GAROWE ONLINE
Baarlamaanka labaad ee Koonfur Galbeed ayaa waxaa la filayaa in ay dhowaan yeeshaan guddoon cusub.

BAYDHABO, Koonfur Galbeed – Guddiga qaban-qaabada doorashada gudoonka baarlamaanka Koonfur Galbeed ayaa lagu waramay in ay maanta bilaabayaan diiwaan-gelinta murashaxiinta.

Xubnaha doonaya in ay qabtaan xilalka kala ah; afhayeenka iyo labadiisa ku xigeen ayaa haysta muddo laba maalmood ah.

Wararka ayaa sheegaya in xukuumada federaalka ay xilka gudoomiyaha la raadineyso Axmed Saciid Fiqi, safiirkii Soomaaliya ee Midowga Yurub, kaasoo ku biiray xeer-dejinta maamulka.

Murashaxiinta ayaa waxaa la hor-dhigay shuruudo adag, wallow illaa iyo haatan aan si rasmi ah loogu soo bandhigin saxaafada.

Warbixino horudhac ah ayaa muujinaya in wasiirada kawada tirsan Golaha Wakiilada iyo Xukuumada loo sheegay in ay waajib tahay in ay is-casilaan si ay u qabtaan xilka guddoonka.

Baarlamaanka Koonfur Galbeed ayaa waqti xaadirkaan tiro ahaan gaaraya 95, waxaana laga soo yareeyay in 129. Illaa iyo haatan, si dhab ah looma ogga ujeedada iyo sababta keentay.

Villa Soomaaliya ayaa horey ugu guuleysatay in ay gacanta ku dhigto hogaanka maamul goboleedka markii ay faragelisay doorashadii December ee dhiiga uu ku daatay markii laga hor-yimid.

GAROWE ONLINE

Wararkii ugu dambeeyey