Soomaaliya: Tirada kiisaska Covid-19 oo gaartay 480, geeridana waa 26
MUQDISHO, Soomaaliya – Wasaaradda Caafimaadka dowladda federaalka ah ee Soomaaliya ayaa maanta oo Isniin ah waxay shaacisay in 24-kii saac ee lasoo dhaafay ay diiwaan-gelisay 44 kiis cusub oo ah Coronavirus.
Fowziya Abiikar Nuur, wasiirka wasaaradaas, ayaa wariyeyaasha Muqdisho u sheegtay in 30 kamid ah ay yihiin Lab, 9-ka kalena Dhedig.
Sidda laga soo xigtay Fowziya, waxaa sidoo kale saacadihii lasoo dhaafay la diiwaan-geliyey saddex kiis cusub oo dhimasho ah.
Wasiiradda ayaa intaas ku dartay in 40 kamid ah bukaanada cusub ay ku sugan yihiin Muqdisho, 4-ta kelana degaanada maamulka Puntland.
"Tiradda guud ee kiisaska waa 480, wadarta dhimashadana waa 26. Waxaa bogsaday afar, tiradda guud ee caafimaadeyna waa 14," ayay Fowziya tiri kadib markii ay shir jaraa'id ku qabatay xafiiska ra'iisul wasaaraha.
Intii ay ku guda jirtay shirka jaraa'id waxay sheegtay 55% dadka uu xanuunka ku dhacay ay da'doodu u dhaxeyso 20-30-jir; 33% waa 40-50 jir.
"Sidaad u jeedaan, kororka aad buu u sareeyaa, waxaan mar kale ku celin lahayn in dadku xoojiyaan feejignaanta," ayay hadalkeeda raacisay.
Soomaaliya ayaa hogaanka u haysa tirada dhimashadda cudurka Covid-19 ee guud ahaan bariga iyo geeska qaaradda hodanka ah ee Afrika. Marka guud ahaan qaaradda laga hadlana, waxay ku jirtaa kaalinta sagaalaad.
MUUQAALKA WASIIRADA
GAROWE ONLINE