Bangiga Ganacsiga ee Itoobiya oo farac ka furanaya Somaliland

Somaliland
By WARIYAHA ADDIS ABABA , GAROWE ONLINE
Mas'uul sarre oo u hadlay Baanka ayaa soo bandhigay goorta ay fulinayaan qorshahaan.

ADDIS ABABA, Ethiopia – Bangiga Ganacsiga ee Itoobiya ayaa ku dhawaaqay in uu qorsheynayo farac uu ka furto degaanadda Somaliland.

Mas'uul sarre oo ka tirsan Baanka kaasoo la hadlay wargeyska Ethiopian Herald ayaa wuxuu shaaciyey in qorshahaan la fulin doono dhowaan.

Qorshahaan ayaa wuxuu ku lamaanan yahay farac ay Bangigooda, sidda ugu dhaqsiyaha badan, kaga sameysanayaan dalka Sacuudiga Carabiya.

Somaliland iyo Itoobiya ayaa waxaa ka dhaxeeya xiriir wanaagsan oo iskaashiga dhanka ganacsiga, siyaasadda iyo ammaanka ah.

Diyaaradda Ethiopian Airlines ayaa haatan duulimaadyo ku tagta Somaliland, taas oo fududeysay isu socodkii labadda dhinac.

Si lamid ah shirkadda duulimaadyadda Itoobiya ayaa waxay jadwal waxay ku leedahay garoomada magaalooyinka Muqdisho, Garowe iyo Boosaaso.

Tewolde Gebremariam, madaxa Ethiopian Airlines, ayaa xusay in qorshahoodu yahay sidii ay baahin lahaayeen dhaqdhaqaaqooda hawada.

"Haatan waxaan sameynaa duulimaadyo 125 oo caalami ah iyo 22 oo maxali ah. Waxaan hiigsaneynaa in aan sii baahino," ayuu caddeeyay.

Bangiga Ganacsiga ee Itoobiya ayaa dhowaan faracyo ka furtay wadamada Suudaanta Koonfureed iyo waddanka Djibouti ee qaaradda hodanka ah ee Afrika.

Mas'uuliyiinta Somaliland ayaa sheegta in ay ka madax banaan yihiin Soomaaliya, balse caalamka wuxuu u aqoonsan yahay maamul hoostaga Muqdisho.

GAROWE ONLINE

Wararkii ugu dambeeyey