​Guddoomiyihii xisbiga UCID gobaolka Saaxil oo xilka laga qaaday

HARGEYSA, Somaliland- Guddoomiyaha xisbiga Mucaaradka UCID Faysal Cali Waraabe, ayaa xilkii ka qaaday guddoomiyihii xisbigaasi u qaabilsanayd gobolka Saaxil Marwo Rooda Axmed Yaasiin.

War qoraal ah oo kasoo baxay xafiiska Guddoomiyaha Ururka, ayaa lagu sheegay in gebi ahaanba guddoomiye Rooda Axmed Yaasiin laga xayuubiyey xilkii ay xisbiga u haysay, waxana xilka-qaadisteeda lagu sababeeyey aflagaaddo la sheegay inay magaca xisbiga ugu geysatay shirkadda dekedda Berbera maalgelinteeda la siiyey ee DPWorld iyo waliba shakhsiyaad kale, waxana la tilmaamay in aanay dib dambe magaca xisbiga ugu hadli Karin.

Eedaha kale ee qoraalkan loogu jeediyey guddoomiyihii gobolka Saaxil u qaabilsanayd xisbiga UCID, ayaa lagu sheegay inay la fadhiisatay xubno aan ka tirsanayn Xisbiga kuwaas oo eedeeyay maamulka sare ee UCID.

Qoraalkan ayaa raalligelin loogu diray shirkadda DPWorld iyo cidkasta oo dhibsatay hadalladii marwo Rooda.,

Rooda Axmed Yaasiin, guddoomiyihii gobolka Saaxil ee xisbiga UCID, ayaa maalmo kahor xukuumaddu xadhig u geysatay, waxana soo baxayey khilaaf huursan oo u dhexeeyey iyada iyo guddoomiye Faysal Cali-waraabe, kaas oo haatan gaadhay in xilkaas laga qaado.

GAROWEONLINE