Somaliland: Codad la tiriyay iyo Muuse Biixi oo hogaaminaya

Somaliland
By Wariyaha Hargeysa , Garowe Online
Haweenay codkeeda doorashada Madaxtinimo ee Somaliland ka dhiibanaysa Hargeysa (Sawirka: AP)

HARGEYSA, Somaliland - Warsidaha Garowe Online ayaa helay macluumaad hoose oo ku saabsan tirada codadka ilaa hadda la tiriyay iyo cida ku horeysa musharaxiinta loolanka ugu jira xilka Madaxweynaha.

Illo Xog-ogaal u ah sida ay u dhacayso doorashada ayaa GO u sheegay in la tiriyay 30% codadkii laga dhiibtay maanta gobollada Maroodi-jeex iyo Saaxil, kuwaasi oo ay dhibteen dad gaaraya 330,000.

Wararka ayaa sheegaya in Musharaxa Xisbiga UCID Feysal Cali Waraabe uu wacdaro ka dhigay magaalada Hargeysa, kadib markii uu helay codad badan, oo dhabarka ka jebiyay Xisbiga Waddani.

Laakiin, xogta Garowe Online uu helay ayaa sheegaysa in codadka illaa hadda la tiriyay Maroodi-jeex iyo Saaxil uu ku horeeyay Musharaxa Muuse Biixi Cabdi, calan-sidaha xisbiga talada haya ee Kulmiye.

Gudiga doorashada waxa uu iclaamiyay in goobaha codbixinta lasoo xiray caawa fiidkii abaare 6: p.m. waqtiga geeska Africa, islamarkaana goobaha qaar la billaabay tirinta codadka.

Waxaa la filayaa in natiijada lagu dhawaaqo maalmaha soo socda, gaar ahaan 17-ka bishan. Halkan ka akhri.

F.G: Xogtan uu Garowe Online helay ayaa laga yaabaa in wax iska bedesho, marka la shaaciyo natiijada.

GAROWE ONLINE