Somaliland oo xukuno ku ridday askar lagu eedeeyay fal dil ah

HARGEYSA, Somaliland – Maxkamadda Ciidamadda Somaliland ayaa xukuno isugu jira dil iyo xarig waxay ku riday saddex askari oo booliis ah.

Maxamed Yaasiin Faarax oo lagu soo oogay dacwad ah dilka marxuum Caydaruus Maxamed Daahir ayaa lagu xukumay dil toogasho.

Xeer-beegtada ayaa tilmaantay in xukunkaas uu yahay qisaasta Caydaruus oo lasoo wariyey in lagu toogtay nawaaxiga magaalada Wajaale.

Sidoo kale, Cabdinaasir Maxamuud Guuleed iyo Cumar Maxamed Cabdi ayaa waxaa lagu waramay in lagu xukumay min 11-sano oo xabsi ah.

Xukunsaneyaasha ayaa lala xiriiriyey khaarijinta Caydaruus, sidda cad gal-dacwadeedka laga gudbiyey, kaasoo ay heshay warbaahinta.

Bishaan Janaayo 15-keeda ayay ahayd markii Somaliland ay toogasho ku fulisay lix eedeysane oo lagu eedeeyay dil iyo argagaxisinimo.

Midowga Yurub oo talaabadaas si xoogan u cambaareeyay ayaa tibaaxay in ay tahay mid si toos ah kaga hor-imaaneysa xuquuqda bini'aadamka.

GAROWE ONLINE