Muuse Biixi oo lagu eedeeyay dagaal ka socda Sanaag

Image

HARGAYSA, Somaliland- In kabadan 20 qof ayaa ku dhimatay dagaal ka dhacay qaybo kamid ah gobolka Sanaag, kaasoo u dhaxeeya beelo halkaas wada daga, sida ay sheegeen dad goob joogayaal ah.

Dagaalkan oo dhacay Axadii, waxaa ku dhaawacmay in ka badan 30 qof, waxaana lagu eedeeyay xukuumadda inay mas'uul ka tahay waxa ka soconaya halka lagu magacaabo deegaanka Darar-weyne.

Suldaanka Guud ee Salaadiinta Somaliland ahna Suldaanka beel-weynta Garxajis, oo shir jaraa'id ku qabtay magaalada Hargaysa, ayaa Madaxweyne Muuse Biixi ugu baaqay inuu dhex-dhexaad ka noqdo waxa ka soconaya Dararweyne, hadii kale dagaalkaas uu noqon doono mid ay galaan beelaha Somaliland oo dhan.

Suldaan Maxamed Suldaan Cabdulqaadir, ayaa sheegay in xukuumaddu hubaynayso mid kamid ah beelahaas islamarkaana saxaafadda ka sheegayso dagaalka ha la joojiyo, taasina ay tahay wax aan la asmaci karin.

"Dagaalka uma dhaxeeyo labo beelood ee wuxuu u dhaxeeya Xukuumad iyo beel, dowladda ayaa rasaasta iyo hubka siinaysa beesha kale," ayuu yiri suldaanka oo intaas ku daray, "Madaxweynaha iyo xukuumadda waxaan ugu baaqayaa in dagaalkaas ay faraha kala baxaan, labada beelood iyagaa dan isugu imaan."

Dhinaca kale, wuxuu Suldaanku Madaxweynaha Somaliland ku eedeeyeen inuu noqdo hogaan Beeleed ee uusan u dhaxayn beelaha Somaliland, wuxuuna ugu baaqay inuu dhex-dhexaad ka noqdo waxa ka socda dalka.

"Shalay waxaa lala lahaa Madaxweynaha Jeegaanta, Muuse waxaan ku leeyahay noqo Madaxweyne Qaran ama Madaxweyne Beeleed." sidaas waxaa hadalkiisa ku sheegay Suldaan Muuse.

Hadalkan ayaa yimid xilli siyaasiyiinta iyo Madaxda Somaliland ay ku baaqayaan in la joojiyo colaadan oo dhowr jeer ka dhacday deegaankaas, waxaana hadda laga cabsi qabaa inay ku fido gobolka Togdheer oo labada beelood wada-dagaan.

GAROWE ONLINE

Related Articles

Booliska Somaliland oo goodiyey rayidka kadib hadalka mucaaradka

Taliyaha bileyska, Maxamed Aadan Saqadhi, ayaa ku hanjabay in ay fooda is-dari doonan cid kasta "rabshad sameysa".

  • Somaliland

    14-11-2022

  • 04:01AM

Xukuumada Biixi oo ka jawabatey go'aanka xisbiyada mucaaradka

Wasiirka arrimaha gudaha, Maxamed Kaahin, ayaa weerar afka ah ku qaadey axsaabta WADDANI iyo UCID.

  • Somaliland

    14-11-2022

  • 03:47AM